Ráðstefnuskrifstofa Íslands

 

Harpa, tónlistar og ráðstefnuhúsið í Reykjavík, er 28.000 m2 að stærð og er staðsett á einstökum stað við gömlu höfnina í Reykjavík. Hönnunin er undir áhrifum frá einstakri og tilkomumikilli náttúru Íslands. Meginhugmyndin með byggingunni er að skapa kristallað form með fjölbreyttum litum sem sóttir eru í nærliggjandi náttúru og gefur þeim er þess nýtur síbreytileg tilfinningaleg áhrif. Hinn þekkti listamaður Olafur Eliasson hannaði glerhjúpinn sem umlykur húsið og hönnuður hússins er Teiknistofa Hennings Larsens í Kaupmannahöfn.

Ráðstefnu og fundaraðstaða
Í tónlistar og ráðstefnuhúsinu Hörpu verður ein glæsilegasta ráðstefnuaðstaða á Íslandi. Húsið er hannað með það fyrir augum að þar sé hægt að halda innlendar og alþjóðlegar ráðstefnur, þing, fundi, sýningar og ýmiss konar viðburði fyrir stóra og litla hópa. Eldhús, veitingarstaður, kaffihús, útsýnisbar og færanlegir barir verða í húsinu.  Gott sýningarsvæði verður í húsinu með tengibrunnum fyrir tölvur og rafmagn. Mögulegt verður að hengja þunga hluti í loftið til kynningar allt upp í bíla.